Søk om midlar

Sparebankstiftinga Sogn og Fjordane deler kvart år ut gåver av overskotet frå Sparebanken Sogn og Fjordane til samfunnsnyttige tiltak. Gåvene frå Sparebankstiftinga Sogn og Fjordane skal bygge opp om visjonen vår om å vere ei drivkraft for Sogn og Fjordane, og skal fremje våre verdiar; mangfald, trivsel og utvikling.

Søknadar om gåvemidlar må registrerast i vår søknadsportal (klikk “Søk her” ovanfor). Søknadar levert på andre måtar vil ikkje bli vurdert.

Organisasjonen du søkjer om midlar til må ha eit organisasjonsnummer (har de ikkje dette enda, kan det ordnast gratis og enkelt på brreg.no). Vi ber òg om at du legg ved eit budsjett for tiltaket du søkjer om midlar til.

Vår søknadsportal gir tilbakemeldingar i form av e-post + sms-varsling. Det tyder at du får svar på søknaden samt kvittering på utførte handlingar til e-postadressa/mobilnummeret du registrerer deg med. Når det er oppgåver du må gjere (t.d. be om utbetaling av tildelt gåve, eller registrere sluttrapport når tiltaket du har fått gåve til er gjennomført), skal dette gjerast i søknadsportalen.

“Kor mykje skal vi søkje om?”

Dette er ofte det første spørsmålet vi får frå lag og organisasjonar – men ikkje lett å svare heilt konkret på. Sparebankstiftinga ønskjer generelt å bidra inn i gode spleiselag. I det ligg det at det er sjeldan Sparebankstiftinga stiller med alle naudsynte midlar; vi ønskjer at alle involverte partar yter etter evne ut frå dei ressursane ein har tilgang til. I tillegg ser vi naturlegvis gjerne at ein også nyttar andre tilgjengelege pengekjelder og støtteordningar. Om de ikkje har eigne midlar å gå inn med, er det difor viktig at de synleggjer kva de bidrar med i tiltaket ein søkjer om midlar til.